O proxecto de lei 96 do Goberno do Quebec outorgará maior protección para a lingua francesa nesta provincia canadense. Entre outras cousas, a nova lei pretende afirmar que a única lingua oficial e común no Quebec sexa o francés.

Fonte: CBC

A biblioteca municipal de Maia, en Portugal, ofrece un curso de lingua portuguesa a persoas refuxiadas ucraínas co fin de facilitar a súa integración no país de acollemento.

Fonte: Notícias Maia

A rexión francesa de Occitania acollerá a 16 edición do Total Festum, unha manifestación cultural que pretende difundir e promocionar as linguas occitana e catalá.

Fonte: Toulouse Infos

A festa Herri Urrats, organizada pola federación vascofrancesa de ikastolas Seaska, congregou milleiros de pesoas para dar o seu apoio ao éuscaro.

Fonte: France Bleu

A carreira a prol da lingua bretoa, Redadeg, percorrerá este ano 2022 km. O diñeiro recadado será destinado a proxectos que promocionen e desenvolvan o bretón.

Fonte: Mediabask

A editorial Lúcia Pinho e Melo anunciou que publicará en lingua portuguesa a mítica biografía de Fernando Pessoa escrita polo autor estadounidense Richard Zenith. A obra levará o título de Pessoa - Uma biografia. 

Fonte: Diário de Notícias

Un equipo de investigación da Universidade Federal do Ceará (Brasil) creou unha ferramenta de tradución automática en nheengatu, a única lingua da Amazonia que procede do tupí antigo.

Fonte: G1

Recentemente celebrouse na localidade dinamarquesa de Tønder o festival Liet International que fomenta o uso das linguas minorizadas europeas na música. Nesta edición, 13 artistas de diferentes países, incluíndo Galicia, participaron no evento.

Fonte: Euronews

A deputada do Sinn Féin, Aisling Reilly, converteuse na primeira persoa en pronunciar un discurso íntegro en gaélico irlandés na Asamblea de Irlanda do Norte.

Fonte: RTÉ

Google anunciou que engadiu 24 novas linguas ao seu repertorio de Google Translate. Entre estes idiomas destacan tres falados en América do Sur: guaraní, quechua e aimará.

Fonte: TechCrunch