Mundo
Cidadáns indíxenas do Perú denuncian que non poden utilizar os seus idiomas para acceder aos servizos públicos
O director de linguas indíxenas do Ministerio de Cultura do Perú declarou que nos últimos anos desapareceron no país andino 37 idiomas orixinarios. Moitos indíxenas denuncian a día de hoxe a imposibilidade de vivir nas súas linguas.
Fonte: Crónica Viva
Os portugueses mostran pouco interese pola lingua portuguesa que se oferta nunha escola de Luxemburgo
Unha nova escola pública abrirá as súas portas en Differdange (Luxemburgo) coa posibilidade de impartir lingua portuguesa. Ata agora os pais do alumnado non manifestaron demasiado interese en que os seus fillos aprendan este idioma.
Fonte: Dnoticias.pt
Unha conferencia organizada no Parlamento Europeo analizará a discriminación de dereitos lingüísticos dos galegofalantes
O Europarlamento acollerá a conferencia co título "Respecto polos dereitos lingüísticos? As discriminacións lingüísticas na Unión Europea", organizada por grupos parlamentarios da Alianza Libre Europea, Os Verdes e a Esquerda Unida Europea en colaboración coa Rede Europea para a Igualdade das Linguas (ELEN). Este encontro contará coa participación d'A Mesa pola Normalización Lingüística que exporá o informe do servizo "Liña do Galego".
Fonte: Sermos Galiza
As universidades toman a iniciativa no ensino de linguas estranxeiras no Reino Unido
As universidades británicas están comezando a ofrecer cursos de nivel inicial de linguas estranxeiras como o francés, o alemán e o español para contrarrestar o declive no ensino destes idiomas en secundaria.
Fonte: The Guardian
Miranda do Douro quere promover a colaboración con Asturias en materia lingüística
O presidente da cámara municipal de Miranda do Douro, Artur Nunes, mostrouse disposto a colaborar co Principado de Asturias no ámbito da investigación lingüística, xa que os idiomas mirandés e asturiano teñen aspectos comúns.
Fonte: RTP
A República Federal Alemá destina 550 millóns de euros a cursos de alemán para refuxiados
O Goberno da República Federal Alemá dobrou o orzamento que destinará a cursos de alemán para refuxiados. Esta partida orzamentaria axudará os refuxiados a aprender a lingua e obter os certificados que precisan para traballar.
Fonte: Ft
A reforma dunha lei permitirá a introdución das linguas indíxenas de México nos programas de radio e televisión
A reforma do artigo 230 da Lei Federal de Telecomunicacións permitirá que se poidan utilizar as linguas indíxenas de México nos programas de radio e televisión.
Fonte: El Universal
A lingua elfdaliana xa ten código internacional ISO
A lingua elfdaliana, falada en Suecia por 3000 persoas, xa ten asignado un código ISO. Esta medida representa un primeiro paso para o seu recoñecemento internacional como lingua per se.
Fonte: The Local
O Goberno dos EUA investirá no ensino do portugués na Universidade de Xeorxia
O Programa de Educación e Seguranza Nacional do Departamento de Defensa dos EUA atribuíu unha bolsa de case 3 millóns de euros ao programa de ensino de portugués da Universidade de Xeorxia.
A RTP e a TVG asinan un acordo de colaboración nunha serie de ficción en galego-portugués
A Radio e Televisión de Portugal (RTP) e a Corporación Radio e Televisión de Galicia (CRTVG) asinaron un acordo no Porto para traballar xuntas na primeira coprodución de ficción. A serie levará o nome de Vidago Palace e, aínda que terá como lingua principal o portugués, contará tamén con actores e actrices que falen galego.
Fonte: Notícias ao Minuto
Boletín
Subscríbase ao boletín
