Un informe de expertos do British Council alerta da urxente necesidade de promover o ensino de linguas modernas no Reino Unido dado que o Brexit podería erosionar aínda máis a xa de por si escasa capacidade lingüística dos escolares británicos.

Fonte: Tes

O Parlamento de Macedonia aprobou un borrador de lei que permitiría que o albanés, falado por un cuarto da poboación do país balcánico, poida ser segunda lingua oficial.

Fonte: Fox News

A plataforma de ensino de linguas Duolingo engadiu agora o chinés mandarín á súa oferta de idiomas e pasa a incluír un total de 27 cursos en liña.

Fonte: Digital Trends

Islandia celebra o Día da Lingua Islandesa para conmemorar o aniversario do nacemento do poeta Jónas Hallgrímsson. Este ano a escritora agraciada co premio que leva o seu nome foi a novelista Vigdís Grímsdóttir, pola súa obra Vaknaðu Þyrnirós.

Fonte: Iceland Review

As cidades timorenses de Dili e Baucau acollerán o Festival de Cinema Itinerante da Lingua Portuguesa que chega este ano á súa oitava edición.

Fonte: Jornal Tornado

O British Council declarou que os medos relativos ao Brexit están a provocar unha acusada baixada dos auxiliares de linguas modernas en Escocia.

Fonte: TES

O Consello de Ministros de Luxemburgo aprobou unha lei que reforzará o papel da lingua luxemburguesa na sociedade. Unha das medidas será a creación do posto de comisario da Lingua Luxemburguesa.

Fonte: Wort

O Goberno local da illa de Pascua, en Chile, aprobou unha norma municipal que converte o rapanui en lingua oficial de todo o territorio insular.

Fonte: La Tercera

Unha escola da provincia canadense de Ontario lanza unha ferramenta en liña que permite aprender a lingua mohawk dos nativos americanos.

Fonte: CBC

O documental Rocky Ros Muc convértese no primeiro traballo cinematográfico rodado en lingua irlandesa que competirá para os premios da Academia dos Óscar.

Fonte: RTÉ